ಅಮ್ಮ

this is for all our mothers back home.
ದಶರಥನಲ್ಲ ನಾನು
ಸಾಯುವದಿಲ್ಲ, ವಿಲಪಿಸಿ ನಿನ್ನಗಲಿಕೆಯ
ದುಃಖದಿಂದ

ಆದರೂ
ಕಾಣಲಿಲ್ಲವೇ ನಿನಗೆ
ನನ್ನ ಮುಖದ ಸುಕ್ಕುಗಳಲ್ಲಿ
ನಿನ್ನ ಬಿಟ್ಟಿರಲಾರದ ನೋವು

ದಶರಥನಲ್ಲ ನಾನು
ಆದರೂ
ಗಂಡನ ಕೋಪ
ಅತ್ತೆ ಮಾವನ
ದಬ್ಬಾಳಿಕೆ
ನಾದಿನಿಯರ ಕುಹಕ
ವನ್ನೆಲ್ಲ ಒಂದು ನಗುವಿನಲ್ಲಿ
ಮರೆಸುತ್ತಿದ್ದೆ

ನಿನ್ನ ಲಾಲಿಕೆಯಲ್ಲಿ
ನನ್ನ ವಿಫಲ ಬದುಕಿನ
ಸಾರ್ಥಕ್ಯ ಕಂಡೆ

ಈಗ ನಡುಗುವ ಕಾಲುಗಳಿಗೆ
ನಿನ್ನ ಹೆಗಲಾಸರೆ ಬೇಕಾದಾಗ
ರೋಗ ರುಜಿನಗಳಿಂದ ಸೋತ
ಮನಕ್ಕೆ ನಿನ್ನ ಸಾಂತ್ವನ ಬೇಕಾದಾಗ
ಹೊರಟೆ ನೀನು, ನಿನ್ನ ಕನಸುಗಳನ್ನರಸಿ
ದಶರಥನಲ್ಲ ನಾನು
ಸಾಯಲಾರೆ

ಮಗೂ, ಬಯ್ಯಲಾರೆ ನಿನ್ನ
ತಡೆಯಲೂ ಆರೆ
ನಿನ್ನ ಏಳ್ಗೆಯ ದಾರಿಯಲ್ಲಿ
ಅಡ್ಡಗಾಲಾಗಲಾರೆ
ದಶರಥನಲ್ಲ ನಾನು
ಸಾಯಲಾರೆ

ಬದುಕುವೆ
ನಿನ್ನ ನೆನಪುಗಳ ಊರುಗೋಲೊಂದಿಗೆ
ನಿನ್ನ ಭೆಟ್ಟಿಯ ನಿರೀಕ್ಶೆಯಲ್ಲಿ